काठमाडौं- निर्वाचन आयोगले दलहरुलाई समानुपातिक उम्मेदवारहरुको बन्द सूची बुझाउनका लागि सोमबारसम्मको समय दियो। उक्त समयभित्र प्राय: सबै राजनीतिक दलहरुले आ-आफ्नो पार्टीको बन्दसूची तयार गरेर अबेर राति भए पनि उम्मेदवारहरुको सूची बुझाए।
सत्तारुढ नेपाली कांग्रेसमा भागबण्डाको राजनीति अन्त्य गर्ने बताएका शेखर कोइरालाले अहिले आफ्नो भागमा कम परेको भन्दै देउवाविरुद्ध विद्रोह गर्ने मुड बनाएका छन्। शेखरको यस्तो अनावश्यक रवैया देखेर उनकै समूहबाट महामन्त्रीमा विजयी भएका गगन थापाले पनि शेखरलाई छोडिसकेका छन्।
समानुपातिकमा उम्मेदवारहरु सिफारिस गर्दा महामन्त्री थापा देउवासँग मिलेर आफूलाई धोका दिएको निष्कर्ष निकाल्दै शेखर कोइरालाले समानुपातिक उम्मेदवारहरुको समानान्तर सूची बनाएर निर्वाचन आयोग पठाए।
नेपाली कांग्रेसका तर्फबाट महामन्त्री विश्वप्रकाश शर्माले सोमबा दिउँसो नै बन्दसूची बुझाइसकेको बताउँदै आयोगका अधिकारीहरुले शेखरले पठाएको समानान्तर सूची फिर्ता गरिदियो।
निर्वाचन आयोगले यही असोज ९ गते राजनीतिक दलहरूलाई आयोगमा बुझाएको समानुपातिक सूचीमा रहेका नामहरू सच्याउनका लागि पत्राचार गर्ने र १६ गतेभित्र सच्याएर ल्याउन समय दिनेछ।
त्यसरी सच्याएर आएको नामावली नै अन्तिम नामावली हुने पनि प्रमुख निर्वाचन आयुक्त दिनेशकुमार थपलियाले बताए। उनका अनुसार आयोगले ती नामावलीलाई असोज २२ गते सार्वजनिक गर्नेछ। सार्वजनिक भएको ती नामावली अनुसार दलहरूले ल्याएको मत परिणामको आधारमा उम्मेदवारहरू निर्वाचित हुने आयोगले व्यवस्था गरेको छ।
निर्वाचन ऐन, कानुन र आयोगले तय गरेको नियमावलीमा आधारित भएर निर्वाचनसम्बन्धी सबै कामहरू अघि बढाउन प्रतिबद्ध भएर लाग्न निर्वाचन आयोगले आग्रह गरेको छ।
आफ्नो सूची फिर्ता भएपछि निराश बनेका शेखरले अहिले ओलीसँग संवाद गरी प्रत्यक्षतर्फ देउवाका उम्मेदवारविरुद्ध बागी उठाउने तयारीमा लागेका छन्। उनलाई गगन थापा, बद्री पाण्डेलगायतले त्यो गलत बाटोमा नहिँड्न सुझाए पनि जागिरे जीवनको अवकाशपछि राजनीतिमा अवसर खोजिरहेका शेखरले पनि उनीहरुको कुरालाई बेवास्ता गर्दै आएका छन्।
शेखरले अराजनीतिक गतिविधि र छलफलहरु गर्न थालेको भन्दै उनकै समूहका रहेका नेताहरु महामन्त्री गगन थापा, मिनेन्द्र रिजाल, बद्री पाण्डेलगायतले पनि शेखरको साथ छोडिरहेका छन्।
उनकै दिदी सुजाताले त यसअघि नै शेखर अराजनीतिक र अपरिपक्व व्यक्ति भएको भन्दै सार्वजनिक टेलिभिजनक कार्यक्रममै बताएकी थिइन्।
समानुपातिक बन्द सूचीमा परिमार्जन गर्न सकिने ठाउँ रहेको भन्दै शेखर अझै बार्गेनिङ गर्ने दाउमा रहेका छन्। आफ्नै प्रतिबद्धता पूरा नगर्ने शेखर अहिले भाग माग्दै र नदिए ओलीसँग मिल्ने चेतावनी दिँदै आएका छन्। उनको यस्तो द्वेध चरित्रबाट कार्यकर्ताहरु पनि रुष्ट बनेका छन्।
जसको पछिल्लो उदाहरण नेपाल प्रेस युनियनको जनकपुरमा भएको दोस्रो बैठक बन्यो। वीपी कोइरालाको जन्मजयन्तीका अवसरमा आयोजित कार्यक्रममा युनियनका अध्यक्ष शिव लम्मसालले शेखरलाई प्रमुख अतिथि बनाएका थिए। तर, जागिरे जीवन सकेपछि अवसरका लागि राजनीतिमा होमिएका आफूभन्दा जुनियर शेखर प्रमुख अतिथि भएपछि जिल्ला तहकै नेताहरुले पनि उक्त कार्यक्रम बहिष्कार गरेका थिए।
यसरी शेखर पछिल्लो समय आफ्नै महत्वकांक्षा र अवसरवादी चरित्र अर्थात् ओली प्रवृतिका कारण एक्लिँदै गएका छन्।
© Lok Kalam . Designed and Developed by Goldenmud Creation