काठमाडौं- पाकिस्तानका प्रधानमन्त्री इमरान खान पदबाट हटेका छन्। आफूमाथिको अविश्वास प्रस्ताव संसदबाट पास भएपछि खान पदबाट हटेका हुन्।

गएराति संसदमा भएको भोटिङमा अविश्वासको प्रस्ताव १७४ मतले पारित भएपछि इमरान खानको प्रधानमन्त्री पद गुमेको हो। पूर्वराष्ट्रिय क्रिकेट खेलाडी खान सन् २०१८ को अगष्टमा पाकिस्तानको प्रधानमन्त्री बनेका थिए।

विपक्षी दलहरुले उच्च महँगी र सुशासनलाई प्रमुख मुद्दा बनाएर सरकारविरुद्ध अविश्वास प्रस्ताव ल्याएका थिए। अल्पमतमा परेपछि खानले गरेको संसद विघटनलाई अदालतले पुनस्थापना गरिदिएको थियो। त्यसपछि गएराति संसदमा अविश्वास प्रस्तावको पक्ष र विपक्षमा भोटिङ भएको थियो।

पाकिस्तानको नेश्नल एसेम्बलीमा ३४२ सदस्य हुन्छन्। विपक्षी दलहरुले १७२ सिट मात्रै पुर्‍याए पनि अविश्वास प्रस्ताव पास हुन्थ्यो। तर अविश्वासको प्रस्तावमा १७४ मत पर्‍यो।

अविश्वास प्रस्ताव पास भएपछि सदनलाई सम्बोधन गर्दै पीपीपीका अध्यक्ष बिलावल भुट्टो जरदारीले १० अप्रिलको ऐतिहासिक महत्व भएको बताए। उनले १० अप्रिल १९७३ मा नै पाकिस्तानको संविधानलाई संसदले पारित गरेको स्मरण गराए।