काठमाडौं- नेपाली कांग्रेसले निवर्तमान सांसद अमरेशकुमार सिंह, केन्द्रीय सदस्य दिनेश कोइरालासहित ७४ जनालाई पार्टीवाट निष्कासन गरेको छ।

मंसिर ४ मा हुने प्रतिनिधि सभा र प्रदेश सभा निर्वाचनमा उनीहरूले पार्टीको नीति र सिद्धान्तविपरीत उम्मेदवारी दर्ता गराएको तथा प्रस्तावक र समर्थक बसेको भन्दै कांग्रेसले कारबाही गरेको हो।

कांग्रेसले पाँच वर्षसम्मका लागि पार्टीको साधारण सदस्यबाट समेत निष्कासन गरेको मंगलबार एक विज्ञप्ति गर्दै कांग्रेस केन्द्रीय अनुशासन समितिले जनाएको छ। 

‘आगामी मंसिर ४ गते सम्पन्न हुन गइरहेको प्रतिनिधिसभा र प्रदेशसभा सदस्य निर्वाचन २०७९ मा नेपाली कांग्रेस पार्टीका आधिकारिक उम्मेदवार र पार्टीले समर्थन गरेको उम्मेदवारविरुद्ध उम्मेदवार भएका र त्यस्ता उम्मेदवारको प्रस्तावक वा समर्थक भएमा नेपाली कांग्रेसको विधान २०१७ (संशोधन सहित) को धारा ३४ को उपधारा ४ (क) बमोजिम ५ (पाँच) वर्षका लागि देहायका व्यक्तिलाई सदस्यता समेत नरहने गरी पार्टीको अभिलेखबाट हटाउन निर्देश गरिन्छ । त्यस्ता बागी, निजका प्रस्तावक एवं समर्थक र अन्य पार्टीमा गई उम्मेदवार भएकाहरूको नामावलीहरू समेत अभिलेखबाट हटाइनेछ । तसर्थ तत्काल केन्द्रीय अनुशासन समितिमा त्यस्ता नामावली पठाइदिन समेत निर्देश गरिन्छ ।’​विज्ञप्तिमा उल्लेख छ।

कांग्रेसले जारी गरेको विज्ञप्तिमा निर्वतमान सांसद सिंह, चितवनमा बागी दिएका कोइराला, गोकर्णेश्वर नगरपालिकाका नगर सभापति श्रीकृष्ण जोशी र काठमाडौं–३ का दीपेन्द्र लामालगायत ७४ जनालाई कारबाही गरिएको उल्ल्ख छ।